Izraeli ka konfirmuar se Kosova do të bëhet pjesë e Forcës Ndërkombëtare Stabilizuese për Gazën (ISF), një mision shumëkombësh që synon mbikëqyrjen dhe zbatimin e armëpushimit në Rripin e Gazës. Kosova bashkë me Kazakistanin do t’i bashkohen vendeve si Maroku, Indonezia, Greqia dhe Shqipëria në këtë iniciativë, e cila pritet të jetë operacionale deri në muajin maj. Kryeministri Albin Kurti ka konfirmuar pjesëmarrjen e Forcës së Sigurisë së Kosovës (FSK) në këtë mision, duke theksuar gatishmërinë dhe kapacitetet profesionale të trupave kosovare për të kontribuar në paqeruajtje dhe stabilitet. Ky hap konsiderohet si një përforcim i imazhit ndërkombëtar të Kosovës si një partner i besueshëm në misionet paqeruajtëse dhe pjesëmarrjen në zgjidhjen e krizave globale.