Ambasadori i Mbretërisë së Bashkuar në Kosovë, Jonathan Hargreaves, ka theksuar se Kosova duhet të dëshmojë me vepra gatishmërinë e saj për të avancuar në rrugën drejt NATO-s dhe Bashkimit Evropian. Ai nënvizoi se progresi nuk është i garantuar dhe varet nga tre faktorë kryesorë: demokracia e besueshme me zgjedhje të lira dhe gjithëpërfshirëse, institucione funksionale me qeveri stabile dhe një shtet multietnik që siguron trajtim të barabartë për të gjitha komunitetet. Hargreaves theksoi rëndësinë e forcimit të institucioneve dhe stabilitetit politik për të avancuar pozicionin ndërkombëtar të Kosovës, duke paralajmëruar se ngërçi aktual mund të dobësojë besueshmërinë e vendit dhe të krijojë hapësira për destabilizim. Mbretëria e Bashkuar mbetet e përkushtuar ndaj sigurisë dhe sovranitetit të Kosovës, duke e mbështetur atë në rrugën e saj euroatlantike.