Kosova ka humbur mundësinë për të përfituar afër gjysmë miliard euro nga Plani i Rritjes i Bashkimit Evropian për shkak të vonesave në zbatimin e reformave të kërkuara. Pavarësisht se deri tani janë përfunduar katër nga shtatë semestrat e planit, shumë reforma kanë kaluar afatin e paraparë, duke bërë që Kosova të ketë përfituar vetëm rreth 7% të fondeve të alokuara. Për më tepër, vendet e rajonit po përgatiten për të përfituar fondet që Kosova dhe Bosnja nuk i shfrytëzojnë, pasi paratë nuk kthehen në Bruksel, por rishpërndahen. Ngërçi politik i vazhdueshëm, me institucione funksionale vetëm për pak muaj që nga fillimi i vitit 2025, ka ndikuar gjithashtu në humbjen e dinamikës në diplomaci dhe proceset integruese, duke ngrirë aplikimin për statusin e vendit kandidat në BE dhe duke vonuar afrimin me NATO-n.