Ministri në detyrë i Infrastrukturës së Kosovës, Dimal Basha, ka kërkuar mbështetje nga partnerët ndërkombëtarë për projektet infrastrukturore, me fokus të veçantë në ato hekurudhore, gjatë pjesëmarrjes së tij në Samitin e Investimeve në Transport. Ai theksoi rëndësinë strategjike të këtyre investimeve për zhvillimin ekonomik të Kosovës, si dhe për forcimin e lidhjeve tregtare dhe integrimin ekonomik në rajonin e Ballkanit Perëndimor dhe Evropë. Në panelin ku mori pjesë Basha ishin ministrat e transportit nga vendet e Ballkanit, Komisioneri Evropian për Transportin, përfaqësues nga Banka Evropiane për Rindërtim dhe Zhvillim dhe Banka Evropiane për Investime. Ministri nënvizoi se Kosova ka projekte të dobishme dhe një vizion të qartë, duke kërkuar që tani të sigurohet mbështetja e nevojshme për avancimin dhe realizimin e tyre.