Ministri në detyrë i Infrastrukturës dhe Transportit të Kosovës, Dimal Basha, mori pjesë si panelist në Samitin e Investimeve në Transport, ku kërkoi mbështetje për projektet strategjike infrastrukturore të vendit, me theks të veçantë në zhvillimin e projekteve hekurudhore. Ai theksoi rëndësinë e këtyre investimeve për zhvillimin ekonomik të Kosovës, përforcimin e lidhjeve tregtare dhe avancimin e integrimit ekonomik evropian. Në samit morën pjesë ministrat e transportit të vendeve të Ballkanit Perëndimor, përfaqësues të Komisionit Evropian dhe institucioneve financiare ndërkombëtare si BERZH dhe BEI. Basha nënvizoi se mbështetja e vazhdueshme nga partnerët ndërkombëtarë është kyçe për realizimin e projekteve që do të forcojnë lidhshmërinë rajonale dhe integrimin e Kosovës në rrjetet evropiane të transportit.