Zëvendëskryeministri dhe ministri në detyrë i Punëve të Jashtme të Kosovës, Glauk Konjufca, i ka dërguar një letër Përfaqësueses së Lartë të Bashkimit Evropian, Kaja Kallas, ku kritikon reagimin e vonuar dhe të kufizuar të BE-së ndaj deklaratës së ministres serbe Snezhana Paunoviç. Paunoviç kishte thënë se, nëse do të ishte në vend të Sllobodan Millosheviçit në vitin 1998, do ta kishte “spastruar etnikisht Kosovën”, deklaratë kjo që Kosova e ka dënuar fuqishëm dhe e ka shpallur atë person non grata. Konjufca kërkon që BE-ja të dënojë publikisht deklaratën, t’u rikujtojë autoriteteve serbe se retorika e tillë është e papranueshme dhe ta trajtojë këtë çështje në kuadër të dialogut politik dhe procesit të anëtarësimit të Serbisë. Komisionarja për Zgjerim e BE-së, Marta Kos, ka përsëritur dënimin ndaj ministres Paunoviç, duke shprehur habi që ajo vazhdon të mbajë detyrën pas deklaratës së saj, ndërsa Kosova pret nga BE të veprojë në përputhje me vlerat dhe parimet evropiane për parandalimin e gjuhës së urrejtjes dhe revizionizmit historik.