Raportuesi për Kosovën në Parlamentin Evropian, Riho Terras, thekson se vendi ka humbur një vit të tërë për shkak të krizës politike dhe mungesës së një qeverie funksionale, çka ka penguar proceset drejt integrimit evropian. Ai nxit partitë politike që të lënë mënjanë dallimet dhe të gjejnë një emërues të përbashkët për të formuar një qeveri të fortë dhe të përqendruar në reforma. Terras vlerëson se, pavarësisht bllokadave, Kosova është ende në rrugën e duhur drejt Bashkimit Evropian, por sfida kryesore mbetet mosnjohja nga disa vende anëtare të BE-së. Ai gjithashtu thekson rëndësinë e dialogut Kosovë-Serbi dhe rolin e Bashkimit Evropian për të nxitur palët në gjetjen e një zgjidhjeje paqësore dhe afatgjate.