Kosova po përballet me një ngërç politik të zgjatur, pasi partitë nuk kanë arritur ende marrëveshje për formimin e institucioneve të reja, duke e lënë vendin në një fazë të pasigurt dhe me institucione jofunksionale. Kjo situatë po pengon rrugën e Kosovës drejt integrimeve evropiane dhe sigurimin e njohjeve të reja, ndërsa analistët theksojnë se pa stabilitet të brendshëm, përparimi në arenën ndërkombëtare është i pamundur. Ministria e Punëve të Jashtme dhe Diasporës thekson se angazhimi diplomatik vazhdon në disa fronte dhe se komunikimi me partnerët ndërkombëtarë për njohje të reja nuk është ndërprerë. Megjithatë, njohësit e fushës paralajmërojnë se çdo vonesë në konsolidimin e qeverisë rrezikon humbjen e mbi 100 milionë eurove nga Plani i Rritjes i Bashkimit Evropian, pasi afatet për plotësimin e reformave janë të rrepta dhe koha deri në fund të vitit është e kufizuar.