Komunat e Vitisë dhe Prizrenit i janë bashkuar nismës qytetare “Ora e Pritjes”, një numërim mbrapsht drejt datës 16 shtator, në mbështetje të ish-krerëve të UÇK-së: Hashim Thaçit, Kadri Veselit, Jakup Krasniqit dhe Rexhep Selimit. Kjo nismë është pjesë e platformës “Liria ka Emër” dhe zhvillohet në komunat e Kosovës me moton “Kosova po pret”. Në Prizren, aktiviteti u shoqërua me fjalime nga kryetari Shaqir Totaj dhe përfaqësues të platformës, të cilët bënë thirrje për bashkim dhe pjesëmarrje masive në “Marshin për Liri” që do të mbahet më 12 shtator në Prishtinë. Gjatë këtij aktiviteti u shpalos edhe një baner me mesazhin “NË EMËR TË POPULLIT – SHPALLENI TË PAFAJSHËM!”, duke theksuar pritjen dhe mbështetjen e gjerë për ish-krerët para vendimit të rëndësishëm më 16 shtator.