Ministria e Mbrojtjes e Kosovës ka konfirmuar se vendi është duke përgatitur dërgimin e trupave të Forcës së Sigurisë së Kosovës (FSK) në Gaza, në kuadër të Forcës Ndërkombëtare Stabilizuese të autorizuar nga OKB-ja me Rezolutën 2803. Kosova ka shprehur zyrtarisht vullnetin për të kontribuar në këtë mision shumëkombësh, duke ofruar kapacitete të specializuara si njësi për deminim, ekipe kërkim-shpëtimi dhe kapacitete të tjera profesionale për stabilizimin dhe sigurinë në terren. Procesi ndjek procedurat ligjore dhe institucionale në vend, duke përfshirë miratimin në Qeveri, Kuvend dhe autorizimin nga Presidentja e Republikës, siç parashikohet në Ligjin për Dërgimin e FSK-së Jashtë Vendit. Ky angazhim konsiderohet një vendim strategjik që forcon partneritetin me Shtetet e Bashkuara dhe rrit rolin e Kosovës si një kontribuese e përgjegjshme në misionet ndërkombëtare të sigurisë dhe paqes.