Kosova rrezikon të humbë deri në 166 milionë euro nga Plani i Rritjes i Bashkimit Evropian nëse nuk formohen institucionet legjitime dhe funksionale deri në fund të vitit. Hulumtuesi i IKD-së, Naim Jakaj, ka theksuar se mungesa e institucioneve po dëmton rëndë kushtetutshmërinë, ligjshmërinë dhe procesin demokratik, duke rrezikuar edhe përfitimin e fondeve evropiane që janë pjesërisht donacione. Deri në fund të qershorit, Kosova ka humbur mbi 50 milionë euro, ndërsa për periudhën qershor-dhjetor rrezikon të mos marrë shumën e mbetur prej 166 milionë eurosh. Jakaj ka paralajmëruar se për të përfituar këto fonde, Kuvendi dhe qeveria duhet të funksionalizohen shpejt dhe të punojnë me intensitet të jashtëzakonshëm për të miratuar ligjet dhe strategjitë e kërkuara nga Plani i Rritjes.