Tre vjet e gjysmë pas dorëzimit të aplikimit për anëtarësim në Bashkimin Evropian, Kosova vazhdon të mbetet e bllokuar në fazën e parë procedurale, pa asnjë lëvizje konkrete nga Këshilli i BE-së për shqyrtimin e kërkesës së saj. Presidenca irlandeze e Këshillit të BE-së, e cila ka vendosur zgjerimin si prioritet, nuk përmend Kosovën në programin e saj, ndërsa pesë shtetet anëtare që nuk e njohin pavarësinë e Kosovës vazhdojnë të mbajnë peng procesin. Përparimi i Kosovës është i lidhur ngushtë me dialogun e ngecur me Serbinë dhe themelimin e Asociacionit të komunave me shumicë serbe, çështje që vazhdojnë të mbeten të pazgjidhura dhe pengojnë avancimin në integrimin evropian.