Ministri në detyrë i Punëve të Jashtme dhe Diasporës së Kosovës, Glauk Konjufca, ka dënuar fuqimisht sulmet e Iranit ndaj Kuvajtit dhe Bahreinit, duke i cilësuar si kërcënim serioz për sigurinë rajonale dhe përpjekjet për stabilitet në Gjirin Persik. Ai theksoi se veprimet e tilla minojnë përpjekjet për uljen e tensioneve dhe rrezikojnë paqen, sigurinë dhe lirinë e lundrimit në këtë zonë strategjike. Konjufca shprehu solidaritetin e plotë të Kosovës me shtetet e sulmuara dhe partnerët ndërkombëtarë në rajon, duke nënvizuar rëndësinë e respektimit të së drejtës ndërkombëtare. Sulmet, që përfshinë goditje me dronë dhe raketa, shkaktuan viktima dhe u justifikuan nga Garda Revolucionare e Iranit si përgjigje ndaj veprimeve amerikane në rajon, duke tensionuar më tej situatën e brishtë në Gjirin Persik.