Zëvendëskryeministri në detyrë dhe ministri i Punëve të Jashtme të Kosovës, Glauk Konjufca, mori pjesë në takimin e ministrave të Punëve të Jashtme në Bratislavë, ku u diskutua për integrimin gradual dhe bashkëpunimin rajonal në Ballkanin Perëndimor. Ai theksoi gatishmërinë e Kosovës për marrjen e statusit të vendit kandidat dhe nisjen e negociatave për anëtarësim në Bashkimin Evropian. Në fokus ishte edhe rëndësia e sigurisë si dimension i ri i integrimit evropian, duke përfshirë bashkëpunimin në fushën e mbrojtjes, sigurisë kibernetike dhe ndërveprueshmërisë me standardet e NATO-s. Konjufca ritheksoi përkushtimin e Kosovës për thellimin e bashkëpunimit me partnerët evropianë dhe avancimin e procesit të integrimit në BE, duke e konsideruar anëtarësimin strategjik për stabilitetin rajonal dhe evropian.