Komisioni Qendror i Zgjedhjeve (KQZ) ka nisur përgatitjet për organizimin e zgjedhjeve lokale të vitit 2027 duke u kërkuar 61 kryetarëve të bashkive të përcaktojnë qendrat e votimit. Në një letër drejtuar autoriteteve vendore, Komisioneri Ilirjan Celibashi kërkon që ambientet e zgjedhura të jenë publike, të aksesueshme, neutrale politikisht, të sigurojnë qetësi dhe siguri gjatë votimit, si dhe të jenë të përshtatshme për personat me aftësi të kufizuara. Sipas Kodit Zgjedhor, qendrat e votimit duhet të jenë kryesisht shkolla, qendra komunitare ose institucione shtetërore, dhe duhet të ofrojnë hapësirë të mjaftueshme për dhomat e fshehta dhe pajisjet teknologjike. KQZ ka vendosur një afat prej 10 ditësh për përpilimin e listës së ambienteve dhe thekson se procesi zgjedhor do të zhvillohet midis datave 15 prill dhe 15 maj, ndërsa zhvillimet e mëtejshme do të ndikohen edhe nga vendimet e Komisioneve të Posaçme për Reformën Territoriale dhe Zgjedhore në Kuvend.