Komisioni Qendror i Zgjedhjeve ka filluar një program dyditor trajnimi për rreth 200 zyrtarë të angazhuar në 38 Komisionet Komunale të Zgjedhjeve, në prag të zgjedhjeve të parakohshme më 7 qershor. Trajnimi përfshin njohjen me procedurat e votimit dhe numërimit, administrimin e votimit me kusht dhe për personat me nevoja të veçanta, si dhe paketimin dhe dorëzimin e materialit zgjedhor. Pjesëmarrësit zhvillojnë edhe ushtrime praktike dhe simulime të situatave reale për të përgatitur staf të kualifikuar dhe për të garantuar një proces zgjedhor transparent dhe efikas. Në përfundim të trajnimit do të bëhet vlerësimi i njohurive të fituara, ndërsa zyrtarët do të vazhdojnë me organizimin e trajnimeve për trupat zgjedhore që do të punojnë në ditën e zgjedhjeve.