Komisioni Qendror i Zgjedhjeve (KQZ) ka reaguar pas publikimit të një videoje në rrjete sociale ku shihen dy persona me një kuti votimi në Rahovec. Sipas KQZ-së, ngjarja ka ndodhur brenda perimetrit të Qendrës Komunale të Numërimit dhe materiali i shfaqur është zgjedhor jo-sensitiv, i shpërndarë një ditë para zgjedhjeve sipas procedurave. Për të sqaruar situatën, KQZ ka theksuar se ekzistojnë pamje nga kamerat e sigurisë, kamerat e qytetit dhe prezenca e Policisë së Kosovës, të cilat vërtetojnë vendndodhjen dhe rrethanat e ngjarjes. Për transparencë, institucioni ka publikuar edhe fotografinë e lokacionit ku është realizuar videoja, duke treguar se ajo është xhiruar në hapësirën e parkingut të palestrës sportive ku ndodhet Qendra Komunale e Numërimit në Rahovec.