Ministri i Administrimit të Pushtetit Lokal, Elbert Krasniqi, ka shprehur shqetësim të thellë për zhvillimet në Kuvendin Zgjedhor të Asociacionit të Komunave të Kosovës, duke ngritur dyshime për shkelje procedurale dhe mungesë legjitimiteti të organeve të zgjedhura. Sipas tij, mbledhja e fundit është karakterizuar nga devijime nga normat dhe shmangie nga rregullat e përcaktuara me Statutin dhe Rregulloren e Punës, duke cenuar integritetin e vendimmarrjes. Krasniqi ka theksuar gjithashtu përpjekjet për t’i dhënë Asociacionit një ngjyrim politik partiak, në kundërshtim me ligjin, dhe ka denoncuar tentativat për përjashtimin e kryetarëve të komunave të udhëhequra nga një subjekt politik i caktuar. Ministria do të shqyrtojë me seriozitet legjitimitetin e vendimeve të marra dhe do të vlerësojë më tej bashkëpunimin me Asociacionin, duke kërkuar që çdo veprim të jetë i bazuar në ligjshmëri, gjithëpërfshirje dhe paanshmëri politike.