Aleanca Kosovare e Bizneseve (AKB) ka shprehur shqetësim për krizën institucionale në Kosovë, e cila po thellohet për shkak të mungesës së dialogut politik ndërmjet mazhorancës dhe opozitës. Moskonstituimi i Kuvendit dhe përplasjet e vazhdueshme po dëmtojnë besimin e qytetarëve, bizneseve dhe investitorëve, duke frenuar vendimmarrjen ekonomike dhe duke dëmtuar imazhin e Kosovës si destinacion investimesh. AKB thekson se opozita duhet të ushtrojë mandatin e saj parlamentar në mënyrë demokratike, ndërsa Kuvendi duhet të jetë vend i debatit dhe votës, jo i përplasjeve fizike. Aleanca i bën thirrje të gjitha partive politike që të ulen në dialog, të respektojnë Kushtetutën dhe të krijojnë institucione funksionale për të shmangur bllokadën dhe krizën e përhershme.