Kryeministri i Serbisë, Gjuro Macut, ka reaguar pas deklaratës së ministres Snezhana Paunoviq, e cila kishte thënë se në vend të Sllobodan Millosheviqit do të kishte kryer “spastrimin etnik të Kosovës”. Ai theksoi se deklaratat personale të anëtarëve të Qeverisë nuk përfaqësojnë politikën zyrtare të Serbisë dhe se ekzekutivi mbetet i përkushtuar ndaj paqes, dialogut dhe respektimit të së drejtës ndërkombëtare. Macut bëri të ditur se ka biseduar me ministren Paunoviq, e cila kërkoi falje për fjalët e saj, dhe kërkoi që çështja të mbyllet për të shmangur polemika të panevojshme. Ai shtoi se nuk është e drejtë që kjo deklaratë të përdoret për vlerësime politike ndaj Serbisë dhe theksoi rëndësinë e respektit të ndërsjellë dhe barazisë në marrëdhëniet ndërkombëtare.