Kryesia e Kuvendit të Kosovës do të mblidhet të hënën në orën 11:00 për të diskutuar dhe propozuar rendin e ditës për seancën plenare të radhës, e para pas vendimit të Gjykatës Kushtetuese që hodhi poshtë dekretin për shpërndarjen e Kuvendit. Në rend dite janë miratimi i procesverbaleve të mbledhjeve të mëparshme, deklarimet jashtë rendit të ditës, pyetjet parlamentare dhe shqyrtimi i disa projektligjeve kryesisht për ratifikimin e marrëveshjeve ndërkombëtare dhe kredive me institucione financiare si Bashkimi Evropian, Banka Evropiane për Investime dhe Fondi Saudit për Zhvillim. Po ashtu, në mbledhje do të formohen komisione ad-hoc për përzgjedhjen e kandidatëve për anëtarë të Komisionit të Pavarur të Mediave dhe Bordit të Radiotelevizionit të Kosovës. Gjithashtu pritet shqyrtimi i propozimit të Grupit Parlamentar të Listës Serbe për emërimin e deputetit Branislav Nikoliq në komisione parlamentare. Kjo mbledhje shënon rifillimin e punimeve të Kuvendit pas pezullimit të përkohshëm të vendosur nga Gjykata Kushtetuese.