Kryesia e Kuvendit të Kosovës do të mblidhet të hënën për herë të parë pas aktgjykimit të Gjykatës Kushtetuese, e cila anuloi dekretin e presidentes Vjosa Osmani për shpërndarjen e Kuvendit, duke e cilësuar atë pa efekt juridik. Në rendin e ditës janë përfshirë disa projektligje për ratifikimin e marrëveshjeve ndërkombëtare, përfshirë marrëveshje për arsimin e lartë në Ballkanin Perëndimor dhe marrëveshje kredie me institucione financiare ndërkombëtare për projekte energjetike dhe infrastrukturore. Gjithashtu, Kryesia do të formojë komisione ad-hoc për përzgjedhjen e kandidatëve për Komisionin e Pavarur të Mediave dhe Bordin e Radiotelevizionit të Kosovës, si dhe do të shqyrtojë emërimet e deputetëve në komisione parlamentare. Aktgjykimi i Kushtetueses i jep Kuvendit 34 ditë afat për zgjedhjen e presidentit të ri, ndërsa në rast dështimi Kuvendi do të shpërndahet dhe do të mbahen zgjedhje të parakohshme brenda 45 ditësh.