Kryetari i Rahovecit, Smajl Latifi, ka akuzuar pushtetin qendror të Lëvizjes Vetëvendosje për diskriminim ndaj komunave që nuk drejtohen nga kjo parti, duke theksuar se mjetet publike duhet t’u shërbejnë të gjithë qytetarëve pa dallim politik. Ai u shpreh në protestën e kryetarëve të komunave në sheshin "Skënderbeu" në Prishtinë, ku kërkuan mbrojtjen e buxheteve, pronës dhe kompetencave komunale, si dhe ndalimin e ndërhyrjeve nga niveli qendror në autonominë lokale. Latifi theksoi se ndarja e mjeteve duhet të bëhet në bazë të popullsisë, territorit dhe nevojave, duke kundërshtuar shpërndarjen e padrejtë ku disa komuna përfitojnë shumëfish më shumë fonde. Kryetarët kërkuan gjithashtu kompensimin e dëmeve nga vërshimet, zbatimin e normës së përvojës së punës dhe financim të drejtë për të gjitha komunat, duke kërkuar drejtësi dhe respektim të ligjit.