Institucionet e Kosovës kanë ndaluar hyrjen në territorin e Republikës së Kosovës kryetarit të Komunës së Nikshiqit në Mal të Zi, Marko Kovaçeviq, për shkak të qëndrimeve të tij kundër pavarësisë së Kosovës dhe rrezikut të përhapjes së mesazheve politike gjatë manifestimeve të Vidovdanit në Gazimestan. Vendimi është marrë gjithashtu për arsye sigurie dhe për të parandaluar tensionet dhe cenimin e rendit publik gjatë aktiviteteve të planifikuara. Dokumenti zyrtar e konsideron Kovaçeviqin kërcënim për rendin publik, sigurinë e brendshme, shëndetin publik dhe marrëdhëniet ndërkombëtare. Partia e tij, Demokracia e re serbe, ka përdorur këtë ndalim për të akuzuar institucionet e Kosovës për politikë antiserbe, ndërsa Kovaçeviq vazhdon të mbështesë qëndrimin zyrtar të Beogradit dhe nuk njeh shtetin e Kosovës.