Komisioni Qendror i Zgjedhjeve ka miratuar listën e 38 qendrave të votimit me kusht në të gjithë komunat e Kosovës për zgjedhjet e parakohshme për Kuvendin. Në secilën komunë është caktuar nga një qendër votimi me kusht, duke përfshirë gjithsej 52 vendvotime ku votuesit mund të ushtrojnë të drejtën e tyre nëse nuk mund të votojnë në vendvotimin e caktuar. Votimi me kusht është i mundur për çdo votues që ka emrin në listën zgjedhore, pasi Kosova funksionon si një zonë e vetme zgjedhore me fletëvotime të njëjta në të gjitha komunat. Numërimi i votave me kusht do të bëhet në Qendrën e Numërimit dhe Rezultateve disa ditë pas zgjedhjeve, pas përfundimit të të gjitha procedurave të nevojshme.