Kryetari i komunës së Skenderajt, Sami Lushtaku, ka përkujtuar me nderim dëshmorët Ismet Uka, Xhemajl Mehmeti dhe Mentor Dervishaj, të cilët ranë heroikisht në fund të qershorit 1998 gjatë Betejës së Hadës. Ata u angazhuan në aksionin e Ushtrisë Çlirimtare të Kosovës për marrjen nën kontroll të Minierës së Mihjes Sipërfaqësore në Bardh të Madh dhe u varrosën me nderime ushtarake më 30 qershor në Plluzhinë të Drenicës. Lushtaku theksoi se sakrifica e tyre është themeli mbi të cilin u ndërtua liria e Kosovës dhe se kujtimi për ta do të mbetet i përhershëm. Ai shprehu mirënjohjen e përjetshme për veprën heroike të dëshmorëve dhe përkujtimin e tyre si pjesë të historisë së lavdishme të luftës çlirimtare.