Kryetari i Skenderajt, Sami Lushtaku, së bashku me komandantin e Brigadës 112 “Arben Haliti”, Jetullah Geci, kanë përkujtuar me nder dhe krenari dëshmorët Arben Haliti dhe Xhemshir Islami. Lushtaku ka theksuar se Arben Haliti ishte një nga luftëtarët e parë që iu përgjigj thirrjes për liri, duke u bërë simbol i guximit dhe vendosmërisë në luftën për çlirimin e Kosovës. Ai ka kujtuar gjithashtu Xhemshir Islamin, i cili ra në të njëjtën ditë gjatë betejave në Koshare, duke dhënë jetën për idealin më të shenjtë të vendit. Sakrifica e tyre, sipas Lushtakut, është themeli mbi të cilin qëndron liria e Kosovës dhe mbetet frymëzim i përjetshëm për brezat që vijnë.