Lidhja Demokratike e Kosovës – Dega në Ferizaj ka shprehur kundërshtimin e saj ndaj vendimit të Kuvendit Komunal për rritjen e tarifës mujore të mbeturinave për amvisëritë nga 6.50 në 9.90 euro, një rritje prej mbi 52 për qind në një kohë kur familjet përballen me vështirësi ekonomike. LDK thekson se kjo rritje është e padrejtë pasi qytetarët po paguajnë për keqmenaxhimin dhe politizimin e ndërmarrjes publike KRM “Pastërtia”, e cila ka probleme serioze financiare dhe menaxheriale të evidentuara nga Zyra Kombëtare e Auditimit. Në raportin e auditimit janë evidentuar borxhe të mëdha, mungesë transparence në punësime dhe kontrata, si dhe probleme në shërbimin ndaj qytetarëve, përfshirë ndërprerje të mbledhjes së mbeturinave. LDK kërkon ndërhyrje të menjëhershme me verifikim ligjor të procesit të miratimit, publikim të analizave financiare, plan ristrukturimi, zbatimin e rekomandimeve të auditorit dhe transparencë në menaxhim para se të diskutohet ndonjë rritje e tarifave.