Instituti i Kosovës për Drejtësi (IKD) ka shprehur shqetësim për angazhimin e Njësive Speciale të Policisë së Kosovës në Skenderaj, duke theksuar se ky veprim ka krijuar perceptimin e ndërhyrjes politike dhe instrumentalizimit të policisë për interesa partiake. IKD nënvizon se Policia e Kosovës duhet të veprojë në mënyrë të pavarur, profesionale dhe ekskluzivisht mbi bazën e ligjit, duke shmangur çdo përdorim të forcës që mund të tensionojë situatën dhe të dëmtojë besimin e qytetarëve. Instituti kërkon që drejtësia të trajtojë personat e dyshuar për sulme në mënyrë efikase dhe të paanshme, pa krijuar shqetësim dhe pasiguri në publik. Gjithashtu, IKD kërkon sqarime publike nga Drejtori i Policisë për arsyet dhe masat e ndërmarra në lidhje me mobilizimin e forcave speciale dhe thekson nevojën për ruajtjen e pavarësisë operative të policisë në funksion të demokracisë dhe sundimit të ligjit.