Pas reagimeve të shumta publike për kushtet e papranueshme në Klinikën e Pediatrisë në QKUK, këshilltari i ministrit në detyrë të Shëndetësisë, Durim Elshani, ka pranuar se sistemi shëndetësor ka trashëguar probleme të mëdha infrastrukturore dhe se nuk është vepruar me intensitet të mjaftueshëm në disa fusha, përfshirë higjienën dhe mirëmbajtjen e ambienteve. Ai theksoi se standardi i kujdesit shëndetësor nuk matet vetëm me investime dhe aparatura, por edhe me pastërtinë e dhomave dhe sjelljen e stafit ndaj pacientëve, ku sipas tij, "nuk e kemi pasur dorën e hekurt". Për Klinikën e Pediatrisë janë ndarë 1 milion e 250 mijë euro për transformim, i cili pritet të nisë vitin e ardhshëm, ndërsa aktualisht po përfundojnë punimet në renovimin e bodrumit dhe kuzhinës. Gjithashtu, katër infermierë janë suspenduar përkohësisht deri në përfundimin e hetimeve lidhur me trajtimin dhe sjelljen ndaj pacientëve.