Ish-ministrja e Punëve të Jashtme, Meliza Haradinaj, ka theksuar se marrëdhëniet ndërmjet Kosovës dhe Shteteve të Bashkuara të Amerikës janë sfiduar më shumë se kurrë gjatë viteve të fundit. Ajo ka përkujtuar se bashkëpunimi i deritanishëm ka qenë i bazuar në një raport ku shqiptarët kanë qenë bashkëpunues, ndërsa SHBA-ja ka pasur pritshmëri dhe kërkesa ndaj Kosovës. Haradinaj ka nënvizuar nevojën që Kosova t’i kthejë "borxhin moral dhe politik" aleatit kryesor, duke theksuar rëndësinë e ruajtjes së trajektores normale të zhvillimit të marrëdhënieve bilaterale. Sipas saj, debati publik në Kosovë kërkon që qeveria dhe institucionet të veprojnë si partnere të SHBA-së dhe të mos lejojnë sfidimin e këtij raporti të rëndësishëm.