Me pak më pak se dy javë para nisjes së vitit të ri shkollor në Kosovë, prindërit dhe nxënësit janë të paqartë për datën e fillimit të mësimit, për shkak të informacioneve të ndryshme që qarkullojnë në rrjetet sociale. Ministria e Arsimit ka konfirmuar se mësimi do të nisë më 1 shtator për të gjitha nivelet shkollore, përjashtuar disa shkolla në renovim. Një tjetër shqetësim i madh i prindërve lidhet me mënyrën e subvencionimit të teksteve shkollore, e cila sipas tyre nuk ka ndryshuar dhe vazhdon të krijojë vështirësi dhe pabarazi, sidomos për nxënësit e shkollave të mesme që nuk përfshihen në mbështetje. Këshilli i Prindërve të Prishtinës kërkon një sistem të centralizuar dhe të unifikuar për furnizimin me libra, duke theksuar nevojën për një qasje më të drejtë dhe funksionale që do të eliminojë problemet e mungesës së librave, vonesave dhe shpenzimeve shtesë për familjet.