Kryeministri i Kosovës, Albin Kurti, zhvilloi një bisedë telefonike me komisioneren për Zgjerim të Bashkimit Evropian, Marta Kos, ku u diskutua për ecurinë e reformave dhe procesin e integrimit të Kosovës në BE. Në fokus ishte miratimi i Planit të Rritjes prej 882.6 milionë euro, që synon përshpejtimin e reformave dhe zhvillimin ekonomik, si dhe buxheti i ri prej 4 miliardë euro. Në gjashtëmujorin e parë të vitit parashihen hapa të rëndësishëm për zbatimin e ligjeve që lidhen me këtë plan, me një vlerë prej rreth 90 milionë euro. Kryeministri theksoi se marrja e statusit kandidat për anëtarësim në BE mbetet prioritet kyç, ndërsa Kosova vazhdon të jetë e harmonizuar me politikën e jashtme dhe të sigurisë të BE-së, duke u bashkuar me sanksionet kundër Rusisë për shkak të agresionit në Ukrainë.