Kryeministri në detyrë i Kosovës, Albin Kurti, zhvilloi një takim virtual me Ministrin Francez të Deleguar për Evropën, Benjamin Haddad, ku u diskutua për integrimin evropian dhe bashkëpunimin bilateral mes dy vendeve. Kurti theksoi përkushtimin e Kosovës ndaj procesit të integrimit evropian dhe pritjet për marrjen e Pyetësorit të Komisionit Evropian, si një hap të rëndësishëm drejt statusit të vendit kandidat. Gjatë bisedimeve u trajtua edhe bashkëpunimi në organizimin e Lojërave Mesdhetare 2030 në Kosovë, që shihet si një mundësi për forcimin e lidhjeve ekonomike dhe kulturore, si dhe për rritjen e investimeve dhe tregtisë. Po ashtu, u diskutua thellimi i bashkëpunimit në fushën e sigurisë dhe mbrojtjes, duke përfshirë transformimin e Forcës së Sigurisë së Kosovës në përputhje me standardet euroatlantike.