Kryeministri i Kosovës, Albin Kurti, priti në takim Ekipin e Kombeve të Bashkuara në Kosovë, të udhëhequr nga Koordinatori për Zhvillim i OKB-së, Stephen O’Malley, ku u diskutua për prioritetet e Planit Strategjik të UNKT për periudhën 2026–2030. Në këtë takim u riafirmua përkushtimi i përbashkët për avancimin e prioriteteve zhvillimore të Kosovës dhe zbatimin e Agjendës 2030, duke theksuar rëndësinë e përputhshmërisë së planit me agjendën kombëtare të zhvillimit. UNKT prezantoi prioritetet e saj për vitin 2026 dhe shprehu gatishmërinë për të mbështetur Qeverinë e Kosovës, veçanërisht në forcimin e kapaciteteve institucionale dhe avancimin e reformave. Kryeministri Kurti nënvizoi përkushtimin e fortë të Kosovës ndaj bashkëpunimit me OKB-në, duke përmendur edhe bashkëfinancimin e programeve të OKB-së, ndërsa të dyja palët ranë dakord për vazhdimin dhe forcimin e mëtejshëm të mekanizmave të koordinimit.