Kryeministri në detyrë i Kosovës, Albin Kurti, ka pritur në zyrën e tij rreth 25 studentë nga mërgata, të cilët janë aktivë në rrjete akademike dhe profesionale në Gjermani dhe Zvicër. Gjatë takimit, u diskutuan zhvillimet politike në Kosovë, roli i të rinjve nga diaspora dhe mundësitë për një bashkëpunim më të strukturuar ndërmjet institucioneve të vendit dhe të rinjve jashtë shtetit. Kurti vlerësoi përvojat dhe angazhimet e studentëve jashtë vendit si një potencial të rëndësishëm për zhvillimin e Kosovës. Ai theksoi nevojën që institucionet të krijojnë kushte që diaspora të kontribuojë në ndërtimin e të ardhmes së vendit.