Kryeministri i Kosovës, Albin Kurti, zhvilloi një bisedë telefonike me Komisioneren për Zgjerim të Bashkimit Evropian, Marta Kos, ku u diskutua për procesin e zgjerimit dhe ecurinë e reformave në Kosovë drejt integrimit në BE. Kurti theksoi miratimin e Planit të Rritjes prej 882.6 milionë euro, si dhe buxhetin e ri prej 4 miliardë euro, të cilat synojnë përshpejtimin e reformave dhe zhvillimin ekonomik të vendit. Në gjashtëmujorin e parë të vitit janë parashikuar hapa të rëndësishëm ligjorë dhe investime rreth 90 milionë euro për zbatimin e planit. Kryeministri nënvizoi rëndësinë e marrjes së statusit kandidat si një hap kyç për anëtarësimin në Bashkimin Evropian, ndërsa Kosova vazhdon të jetë e harmonizuar me politikën e jashtme dhe të sigurisë të BE-së, duke u bashkuar me sanksionet kundër Rusisë për shkak të luftës në Ukrainë.