Sekretari i Përgjithshëm i Aleancës, Avni Arifi, ka deklaruar se kryeministri në detyrë, Albin Kurti, nuk ka pranuar të diskutojë ofertën me gjashtë pika për bashkëpunim që Aleanca i kishte dërguar më 26 qershor. Sipas Arifit, Kurti as nuk i ka ftuar për takim dhe as nuk ka dhënë përgjigje, duke injoruar plotësisht mundësinë për sigurimin e shtatë votave që Aleanca ofronte. Ai mohoi pretendimet se partia e tij kishte vendosur kushte dhe theksoi se oferta mbetet e vlefshme dhe e hapur për diskutim. Nëse Kurti vazhdon ta injorojë këtë ofertë, Arifi e sfidon atë që të sigurojë vetë votat dhe të marrë përgjegjësinë për zgjidhjen e ngërçit institucional, duke kujtuar se edhe në zgjedhjet e kaluara Kurti kishte refuzuar bashkëpunimin me Aleancën dhe kishte çuar vendin në zgjedhje.