Kryeministri në detyrë i Kosovës, Albin Kurti, ka bërë thirrje të forta ndaj Bashkimit Evropian dhe Shteteve të Bashkuara që të ushtrojnë presion mbi Serbinë për të deklasifikuar dokumentacionin lidhur me krimet e luftës në Kosovë. Ai theksoi se, në vend që të hapë arkivat, Beogradi po arreston persona që kishin dëshmuar për këto krime, duke i akuzuar për spiunazh. Kurti përmendi dosjen e Brigadës së Motorizuar 38 të Ushtrisë Jugosllave, e cila është klasifikuar deri në vitin 2044, duke theksuar se nuk mund të pritet edhe 18 vjet për të zbardhur të vërtetën. Ai kërkoi që dokumentacioni të deklasifikohet sa më shpejt për të ndihmuar familjet e mbi 1,500 personave të zhdukur që të marrin përgjigje dhe të varrosin të afërmit me dinjitet.