Kryeministri në detyrë i Kosovës, Albin Kurti, po merr pjesë në edicionin e 28-të të Simpoziumit SYMI në Greqi, ku po diskutohet mbi sfidat globale të demokracisë, sigurisë dhe rendit ndërkombëtar. Ai është pjesë e panelit “Frontline democracies – The Balkans, Ukraine and more”, ku ka theksuar rëndësinë e mbrojtjes së demokracisë në Ballkan dhe Ukrainë, si dhe rolin kyç të zgjerimit të Bashkimit Evropian në këtë proces. Kurti ka vënë në dukje se nuk kemi përplasje mes civilizimeve, por një konflikt të brendshëm mes ndërgjegjes dhe reaksionit, duke paralajmëruar se autokratët janë të lidhur me një epokë të gabuar dhe nuk mund të triumfojnë mbi republikën demokratike. Ai ka nënvizuar se demokracitë e vjetra duhet të mësojnë nga shoqëritë që luftojnë çdo ditë për hapësirë demokratike evropiane, duke theksuar se Evropa fillon në shtëpi dhe përfundon në vijën e frontit në Ukrainë.