Kryeministri i Kosovës, Albin Kurti, priti ambasadorin amerikan në NATO, Matthew Whitaker, ku falënderoi SHBA-në për mbështetjen e vazhdueshme ndaj Kosovës dhe theksoi rëndësinë e bashkëpunimit të ngushtë në fushën e mbrojtjes. Ai paralajmëroi se Serbia, e mbështetur nga Rusia dhe Kina, po blen armë dhe po forcon praninë ushtarake pranë kufirit me Kosovën, duke kërcënuar stabilitetin rajonal. Kurti nënvizoi se përshpejtimi i anëtarësimit të Kosovës në NATO do të ishte një hap kyç për garantimin e paqes dhe sigurisë afatgjatë në Ballkan. Ai gjithashtu vlerësoi marrëdhëniet e forta ndërmjet Kosovës dhe SHBA-së, të ndërtuara mbi vlera të përbashkëta dhe besim të thellë.