Afati për zgjedhjen e presidentit të ri të Kosovës përfundon sot në mesnatë, por nëse opozita nuk merr pjesë në votim, sipas Vetëvendosjes nuk do të ketë zgjedhje automatike. Këshilltari i kryeministrit Albin Kurti, Jeton Zulfaj, ka bërë të ditur se në rast të mosvotimit nga opozita, çështja do t’i drejtohet Gjykatës Kushtetuese. Ai ka përmendur aktgjykimin KO29/11 të Gjykatës Kushtetuese, sipas të cilit deputetët janë të detyruar të marrin pjesë në tri raundet e votimit për president dhe mospjesëmarrja përbën shkelje të Kushtetutës. Vetëvendosja thekson se zgjedhja e presidentit është një detyrë kushtetuese e rëndësishme dhe nuk mund të çojë automatikisht në zgjedhje të reja në rast të dështimit të votimit.