Kryeministri i Kosovës, Albin Kurti, ka përkujtuar Ditën e Kushtetutës duke theksuar se Kushtetuta e Republikës së Kosovës është themeli juridik që garanton funksionimin demokratik të institucioneve në shërbim të qytetarëve dhe interesit publik. Ai e ka cilësuar Kushtetutën si aktin themeltar që normon vullnetin dhe të drejtat e qytetarëve për një shtet të pavarur, demokratik dhe të barabartë. Kurti ka nënvizuar nevojën për përkushtim të vazhdueshëm nga institucionet dhe zyrtarët publikë për të vepruar me integritet, maturi dhe besnikëri ndaj rendit kushtetues. Gjithashtu, ai ka theksuar rëndësinë e institucioneve që interpretojnë normat kushtetuese për ruajtjen e ekuilibrave të pushteteve dhe besimin e qytetarëve, duke riafirmuar angazhimin për përgjegjësi të lartë shtetërore dhe qytetare si garanci për paqe, demokraci, drejtësi dhe siguri në të ardhmen evropiane të Kosovës.