Ministrja e Industrisë, Ndërmarrësisë, Tregtisë dhe Inovacionit, Mimoza Kusari-Lila, njoftoi në seancën e Kuvendit se janë parashtruar 206 kërkesa për verifikim të njehsorëve elektrikë, pas raportimeve për keqllogaritje të kohës nga këta aparate. Ajo theksoi se deri në aktivizimin publik të çështjes nuk kishte asnjë kërkesë tek Zyra për Mbrojtjen e Konsumatorit, ndërsa dje ishin 70-73 kërkesa dhe sot numri u rrit në 206. Ministria ka themeluar një grup punues ad-hoc për verifikimin e jashtëzakonshëm të njësive matëse, në bashkëpunim me Agjencinë e Metrologjisë dhe Inspektoriatin Qendror të Tregut, dhe rezultatet do të bëhen publike. Kusari-Lila sqaroi se deri tani nuk janë gjetur manipulime në vëllimin e energjisë së matur, por çështjet lidhen me tarifat dhe kohët tarifore, ndërsa ligji për Metrologjinë parashikon sanksione për subjektet që shkelin rregullat.