Gjykata Kushtetuese është para një vendimi kyç lidhur me konstituimin e Kuvendit, çështje që mund të zgjidhë bllokadën institucionale aktuale. Kërkesa për masë të përkohshme u depozitua këtë të hënë, ndërsa njohësit e drejtësisë theksojnë se shkeljet e Kushtetutës janë evidente dhe se Gjykata ka mundësinë të përcaktojë pasojat juridike të këtyre shkeljeve. Vendimi i Kushtetueses pritet të ndikojë edhe në legjitimitetin e Qeverisë së re të Albin Kurtit, e cila po quhet Qeveria 4, pasi nëse nuk konfirmohet konstituimi i Kuvendit, atëherë edhe veprimet e kryetares së Kuvendit mund të jenë në kundërshtim me ligjin. Partitë opozitare, përfshirë PDK-në dhe Aleancën, kanë paralajmëruar se do ta kontestojnë konstituimin e Kuvendit në Gjykatën Kushtetuese, duke theksuar rëndësinë e këtij vendimi për stabilitetin politik.