Kuvendi i Republikës së Kosovës do të mbajë seancë të rregullt plenare të enjten, më 2 prill, në orën 10:00, ku do të shqyrtohen disa projektligje të rëndësishme për ratifikimin e marrëveshjeve ndërkombëtare. Në rend dite janë shtatë projektligje që përfshijnë marrëveshje me Bashkimin Evropian për programet IPA 2017 dhe 2018, si dhe marrëveshje kredie me Bankën Evropiane për Investime, Bankën Evropiane për Rindërtim dhe Zhvillim dhe Fondin Saudit për Zhvillim për projekte në energji, infrastrukturë dhe mjedis. Gjithashtu, në seancë do të formohen komisione ad-hoc për përzgjedhjen e anëtarëve në Komisionin e Pavarur të Mediave dhe në bordin e Radiotelevizionit të Kosovës. Në rend dite janë edhe emërimi i deputetit Branislav Nikoliq në komisione parlamentare, shqyrtimi i buxhetit të Komunës së Zubin Potokut dhe formimi i komisionit për hartimin e projektligjit për parandalimin e vetëvrasjes.