Kuvendi i Kosovës përmbylli një seancë të jashtëzakonshme plenare gjatë së cilës miratoi në parim dhjetë projektligje të ndryshme pas disa orësh diskutimesh intensive. Ndër më të diskutuarit ishte Projektligji për Masat e Përkohshme për Produktet Themelore në Raste të Destabilizimit të Tregut, i cili u miratua me 63 vota pro dhe 19 kundër. Po ashtu, kaluan në parim edhe Projektligji për Sigurimin e Detyrueshëm të Kujdesit Shëndetësor me 65 vota për, si dhe ligje të tjera si ai për Shërbimet e Pagesave, ndryshimet në ligjin për Kontabilitet, Lojërat Mesdhetare “Prishtina 2030”, financimin e menaxhimit të resurseve ujore, banimin social dhe të përballueshëm, shtetësinë, lëndët plasëse dhe provimin e maturës shtetërore.