Lidhja Demokratike e Kosovës ka emëruar tre sekretarë të rinj në pozita kyçe të partisë, në kuadër të një faze konsolidimi organizativ dhe politik. Ilir Ferati, kryetari i Istogut, është emëruar Sekretar i Përgjithshëm, me përgjegjësi për drejtimin dhe koordinimin e aparatit institucional dhe administrativ të partisë. Sokol Haliti, kryetari i Vitisë, do të jetë Sekretar për Mërgatën, duke u fokusuar në forcimin e lidhjeve me diasporën dhe përfshirjen e saj në zhvillimet politike dhe shoqërore. Ndërsa Visar Azemi, anëtar i kryesisë, është emëruar Sekretar Organizativ, me detyrë koordinimin e strukturave partiake dhe rritjen e efikasitetit në të gjitha nivelet. Kryetari i LDK-së, Lumir Abdixhiku, ka falënderuar për kontributin e mëparshëm Sekretarin e partisë Imri Ahmeti dhe ka paralajmëruar se së shpejti do të prezantojë edhe përbërjen e re të Kryesisë së partisë, si pjesë e procesit të mëtejshëm të riorganizimit dhe fuqizimit të strukturave drejtuese.