Analisti Ibrahim Shala vlerëson se qëndrimi i Lidhjes Demokratike të Kosovës për të hequr dorë nga bashkëqeverisja me Lëvizjen Vetëvendosje dhe gatishmëria për të votuar një president konsensual kanë krijuar një realitet politik krejt të ri në Kosovë. Ky veprim i LDK-së ka ndryshuar atmosferën politike pas zgjedhjeve dhe ka synimin për të ndërtuar një identitet të veçantë brenda opozitës, duke u dalluar nga PDK-ja dhe Aleanca. Sipas Shalës, zgjedhja e presidentit mbetet çështja më problematike, ku Vetëvendosja kërkon një marrëveshje paraprake për të siguruar konsensusin dhe për të shmangur bllokadën institucionale. Ai thekson se situata aktuale është rezultat i një boshllëku kushtetues që lejon taktizime dhe bllokada, ndërsa opozita nuk ka propozuar ende ndryshime për të zgjidhur krizën politike.