Lidhja Demokratike e Kosovës ka reaguar me kritika të forta ndaj Lëvizjes Vetëvendosje për mënyrën se si po menaxhohet procesi i zgjedhjes së Presidentit të Republikës së Kosovës. LDK-ja thekson se ky proces duhet të zhvillohet me seriozitet, përgjegjësi institucionale dhe në frymën e konsensusit që kërkon Kushtetuta, ndërsa e akuzon VV-në se e trajton zgjedhjen si një garë politike dhe jo si një përpjekje për dakordim politik. Sipas LDK-së, kjo qasje joserioze dhe e papërgjegjshme po e çon vendin drejt kalimit të afateve kushtetuese dhe rrezikon shpërndarjen e Kuvendit dhe organizimin e zgjedhjeve të reja, duke cenuar stabilitetin institucional që qytetarët presin dhe meritojnë. LDK-ja gjithashtu thekson se konsensusi nënkupton një proces të përbashkët diskutimi dhe dakordimi për një figurë që përfaqëson unitetin institucional dhe gëzon mbështetje të gjerë parlamentare, gjë që sipas saj mungon në qasjen e VV-së.